Beauty of Makeup: مشتريات H&M

بسم الله الرحمن الرحيم

اهلين جميلاتي

مساء الخير

رحت يوم الجمعة H&M و كان منزل اشياء جميلة للبرد و مرة عجبتني بس ماشتريت منها شئ لان مكة بردها مو قوي فما احتاجها بس شكلي حرجع اخذي لي كم بلوزة صوفية خفيفة ^_^ لانها مرة كيوت..

طبعا بناء على طلبكم يا حلوين حنزل اول haul لي و هي عبارة عن اشياء بسيطة و ان شاء الله يعجبكم..

Chain Necklace

هالسلسة مرة متنشرة بكل المحلات و كنت بدور علي شكل معين لان في الكبيرة مرة و في الصغيرة مرة و انا حابه الوسط الي تجيكي معدن بدون لمعة الحديد.. و ان شاء اخذ نفس الشكل بس فضي و ذهبي بس من مانجو.. هالسلسة سعرها ب59 ريال من المعدن الثقيل يعني مو مرة خفيفة.. لونها معدني على بني غامق ( وصف خطير ههههههه )

Red Lip Gloss

H&M عنده قسم خاص بالمايك اب و في بعض الاشياء مرة حلوة.. طبعا انا مجنونة لون احمر فيوم شفت هالقلوس مرة تجننت عليه و اخذته بس ما توقعت بيطلع خطيير..

علبته صعنونة بس مرررة حلوووة و حركات صعبه.. الغطاء لونه روز قولد ( نحاسي ) و H&M منزل حاليا مجموعة مايك اب مرة حلوة و كلها بالروز قولد ( نحاسية ) << ذكرتني بمجموعة ري ري من ماك طبعا التغليف النحاسي..

القلوس مرة كيوت و خفيف و احلى شئ فيه انه ما يعطيكي احساس ان شفايفك حتتغرا مع بعض.. و شئ خطيرررر به انه بلمعة حمراء جميلة تعطي شفايفك لوك مميز..

شكل فرشة القلوس مرة حلوة و ناعمة

هنا بتشوفي لون القلوس كيف انه جميل و لمعته كمان مرة جميلة

سعره مرة حلووو

ب 26 ريال

Hair Elastics Band

من الاشياء الضرورية الي لازم اشتريها كثير هي ربطات الشعر المطاطية لان بستخدمها بشكل يومي و اغلب الاوقات تتقطع من كثر الشد هههههه.. و اكثر شئ عجبني بهالربطات البنية لانها بدون حديدة ( ياكثر ماقطعت شعري الحديدة ذي ) .. وسعرها مرة حلوو 9 ريال لكل مجموعة..

Bun Roll

اكثر تسريحة بسويها بالدوام هي الكعكع او الـ Bun لانها خفيفة و سريعة.. طبعا انا بستخدم الحشوة الدائرية و عندي منها على مقاسين صغيرة و وسط ( لان شعري طوله متوسط ) و H&M بيبيعها بس انا حبيت اجرب هالشكل لان احس تقدري تسوي بها تسريحات مختلفة..

الشئ المميز بالرولر هذي ان نهايتها طقطق و هذا الشئ مرة عجبني لانها بتسهل عليكي جمع الطرفين مع بعض.. و الطقطق من النوع الكبير القوي عشان ما تنفتح بسرعة..

هنا عملتها على شكل دائري عشان يبان حجمها صح..

و بيجي معاها ورقة صعنونة فيها ثلاث تسريحات تقدري تعلميها بها

هنا التسريحة الاولى..

وهنا التسريحة الثانية و الثالثة

ايش رايكم فيها؟!

سعرها بـ 26 ريال

Makeup Bag

دايما اخذ شنط المايك اب الصعنونة من H&M لانها واسعة و عملية و بتلقيها بمقاسات مختلفة و حاليا منزلين الوان مرة تجنن بس اكثر شئ عجبني هالشنطة لان مقاسها وسط و واسعة و تجي بثلاث الوان: الموف - الفضي - الذهبي ( كلها خلفيتها سوداء )..

هنا شكل الشنطة من الداخل

مرة عجبتني العبارات الي داخل الشنطة

سعرها مرة يجن بـ 29 ريال

Organic Cotton Socks

مرة احب شراريب H&M لانها مصنوعة من القطن الطبيعي و مريحة جدا و عملية كمان ( غسلتها كثير و ما انعدمت ابد ) و توفيرية كمان لانها تجيكي بمجموعات جدا جميلة ..

هذي المجموعة تتكون من 7 شراريب ( 4 منها بجلد الفهد و حمار الوحش و 3 منها سادة ).. اخذت هالالوان الغامقة لاني دايما باللبس اسود كثيييير او كل ملابسي لازم يدخل فيها اللون الاسود خصوصا حاليا بموسم الشتاء..

جميلة صح؟

المجموعة كاملة سعرها بـ 59 ريال

Fox Ear Hat

و اخيرااااا حصلت على القبعة الي تجي باذاني.. شكلها مرررررة كيوت باللبس و مريحة كمان و لونها جمييييل..

Infinity Scarf

طبعا الاجواء صارت باردة فحبيت اخذ هالوشاحين الي تجيكي على شكل دائرة.. احلى ما فيها انك ما راح تتعبي بالبسها بس لفيها على رقبتك مرتين..

سعرها بـ 59 ريال للواحد

Basic T-Shirt

احب اشتري هالبلايز السادة للدوام لانها مريحة و تقدري تلبسي فوقها أي جاكيت حابته.. اول مرة باخذها من H&M و صراحة مرة عجبتني لان خامتها ممتازة و مريحة باللبس و باردة..

و سعرها جدا جميل بـ 29 ريال للوحدة

Basic Tops

تقريبا مافي لون لاي توب الا وهو عندي.. احب البسهم تحت البلايز المفتوحة او الشفافة.. و هالونين من الالوان الي بالبسها كثيييير و الاسود كمان.. طبعا H&M عنده الوان كثيييييييييييييييرة و جميلة لهالتوبات و خامتها مرة حلووة..