RiRi Love Mac Collection Haul

بسم الله الرحمن الرحيم

اهلين جميلاتي

نزلت الاسبوع الي فات صور لمشترياتي بالانستقرام و كثيير عجبوا بها فحبيت انزل عنها بالبلوق. احدى مشترياتي كانت من ماك و كانت شئ جدا جدا مميز و ماني مصدقة اني لحقتها وهي الـ RiRi Collection.. 

اول مانزلت ما كان على بالي ابد اني راح اشتريها بس بعد ماشفت صورة بحساب الامورة وفاء احمد   THEARTISTICHANDS ان مجموعة ري ري وصلت جدة تحمست قلت اكيد حتجي لمكة فتواصلنا انا و اختي مع فرع ماك عشان نعرف متى المجموعة راح تنزل فبلغونا انها بنهاية الشهر راح تكون بالمحل و الحمدلله نهاية الشهر صادف يوم اجازة الي هو السبت و من الساعة 10 و انا عند المحل انتظر متى يفتح فاول ما فتح لحقت على الاغراض و بس حاسبت الا الكم الهائل من البنات هجموا على الباقي و خلصت المجموعة تقريبا بعد ساعة فقط..

المجموعة صح جميلة و الوانها حلوة بس بعضها تقدري تلقي بدائل لها.. انا شخصيا بحب اكثر شئ بالمايك اب الارواج و البلاشر و بستخدمهم بشكل يومي..

RiRi Duo Blush

اكثر شئ ميز مجموعة ري ري لون العلب النحاسي.. شئ جدا جميل و فريد ( صراحة عن نفسي اول مرة بشوف علبة مايك اب لونها نحاسي ياااي يجنن )..

البلاشر هذا جدا جميل و عجبني اكثر شئ فيه انه مقسم لقسمين ( قسم برونز و قسم بلاشر وردي بلمعة ).. و هذي الميزة اكثر شئ عجبت اغلب الناس..

الوانها جميلـــة

سعر البلاشر بـ 163 ريال

RiRi Matte Lipstick

اكثر شئ حبيته بالمجموعة كانت الارواج ومن اول ماشفتها كنت مخططة على اللون الاحمر الشهير RiRi Woo بس يوم جربت اللون العودي الغامق بالمحل حبيته لان لونه جدا جدا مميز..

طبعا كبقية المجموعة علب الارواج  كانت نحاسية جميلة و مكتوب عليها ري ري تحب ماك << مرة شكلها جناااااان

 الروجين الي حبيتهم اكثر شئ

Talk That Talk

روج عودي غامق مطفي جدا فافضل شئ قبل ما تحطينه حطي مرطب شفايف عشان ما ينشف شفايفك.. لونه جميل و غامق و بيثبت على شفايفك لوقت طويل..

لون الروج.. جميل جدا صح ؟!

سعره بـ 111 ريال

RiRi Woo



الروج الاحمر الشهير الي دايما بينزل بمجموعات ري ري و ايضا انشهرت به المغنية ريانا.. كثير كثير حبيت لونه المميز.. ايضا هو مطفي كالعودي و لازم تحطي مرطب شفايف قبل ما تستخدميه.. ثباته جميل و لونه قوي..

لون الروج.. احمر جميل صح ؟!

 سعره بـ 111 ريال

أتمنى عجبكم البوست!! ^_^

سي يآآ..